Одлуката за наплата на паркинг-просторот во центарот на градот, која минатата година ја донесе Советот на Општина Штип, од 1 јуни стапува на сила.
Градоначалникот на општина Штип, Илчо Захариев, на вчерашната седница на Советот на Општината, најави дека ќе ја почитува одлуката донесена од страна на советниците од претходниот состав, која се однесува на наплатата на паркинг-местата во строгиот центар на градот.
Во согласност со оваа одлука, 600 паркинг-места во центарот на градот од 1 јуни ќе се наплаќаат по цена од 25 денари за еден час.
Директорот на јавното претпријатие „Стипион 2011“, Тони Јованов, најави дека во следните десетина дена треба да се набават терминали за наплата на паркинг-местата, а сè уште не е одлучено на кој начин ќе се врши наплатата.
Според најавите на градоначалникот и според состојбата на општинскита каса, не би требало да има нови вработувања.