Бесплатен паркинг за жителите на Центар, за семејствата на жителите на оваа општина и бесплатна гостинска карта се новите поволности за паркирање за жителите на Центар, кои ќе важат од 1 април.
Ова на денешната прес-конференција го соопштија градоначалникот на општина Центар Владимир Тодоровиќ, директорката на ЈП Паркинзи на општина Центар Маргарита Бакев и директорот на ЈП Градски паркинг Борче Јакимовски.
Од 1. април жителите на Центар бесплатно ќе ги паркираат сите свои возила. Единствен услов е жителите на Центар да поседуваат сопствено возило.
Жителите на општина Центар од сега ќе можат да им обезбедат бесплатен паркинг на членовите на своето семејство. Поточно, жителите на Центар ќе можат да пријават три возила на членови на семејството (мајка, татко, син, ќерка, баба, дедо, чичко, тетка…) без разлика дали тие се жители на општина Центар, кои во текот на целата година ќе можат да дојдат на гости кај семејството и притоа за нив паркингот ќе биде бесплатен. Единствено што треба да направат е да се јават на 072 251 251 и да ги најават возилата на семејството.
Гостинската карта и покрај промотивниот период и понатаму останува бесплатна за жителите на Центар.