Јавното обвинителство во Битола спроведе истражна постапка за убиството на 80-годишниот старец од мариовското село Маково, кој бил претепан до смрт бидејќи ја пофалил работата на Специјалната јавна обвинителка, Катица Јанева.
Осомничениот се товари дека пред продавницата во селото неколку пати го удирал со овчарски стап по главата старецот, по што тој починал. Тој претходно кажал дека им се радувал на кривичните гонења на поранешните министри за внатрешни работи и транспорт и врски, Гордана Јанкулоска и Миле Јанакиески.
Од ударот, старецот се здобил со повеќе повреди на главата, а по два-три часа умрел во Одделението за хирургија во Клиничката Болница во Битола.
Надлежниот обвинител до Судијата на претходна постапка на Основниот суд во Битола поднесе барање и за определување на мерка притвор за осомничениот.