Основното јавно обвинителство за гонење на организиран криминал и корупција денеска соопшти дека отворило предмет по допрен глас во врска со набавката на софтверот за „определување на просечна брзина на возилата во сообраќајот и изрекување казни“ – случајот по кој деновиве беше актуелен во јавноста поранешниот генерален секретар на Владата, Драги Рашковски.
„Следејќи ги повеќедневните написи во медиумите за набавката на софтверот од страна на Генералниот секретаријат на Владата, обвинителството отвори предистражна постапка, при што предметниот обвинител издаде повеќе наредби за прибирање на потребната документација. По наредбите ќе постапуваат истражителите од истражниот центар при Основното јавно обвинителство за гонење на организиран криминал и корупција,“ се вели во соопштението од Јавното обвинителство.
Во меѓувреме, откако беа издадени наредбите, Министерството за внатрешни работи до обвинителството достави известување во врска со нивното постапување во случајот, додаваат од Обвинителството.