Основното јавно обвинителство Велес поднесе обвинителен акт против осум лица од Кавадарци за фалсификување и пуштање во промет на лажни американски долари и четворица вработени во експозитура во една банка во Кавадарци за злоупотреба на службена положба и овластување, бидејќи откупиле вкупно 696 лажни банкноти во апоени од по 50 американски долари, во вкупен износ од 34.800 американски долари без да извршат рачна и машинска обработка на банкнотите за утврдување на нивната автентичност.
Првообвинетиот, како што информираат од ОЈО, во временскиот период од 17 април до 3 мај 2018 година, искористувајќи ист траен однос, исти прилики и слични околности, во повеќе наврати со умисла извршил повеќе временски поврзани дејствија што претставуваат повеќекратно остварување на исто кривично дело.
Тој ја искористил деловната соработка и во експозитурата на банката во Кавадарци пуштил во оптек лажни пари – 137 банкноти во апоени од по 50 американски долари. Банкнотите се разликувале од оригиналните според техниката на печатење, видот на хартијата, техниката на печатење на сериските броеви, водениот жиг, заштитниот конец, оптичката варијабилна боја и неимитираната ИП заштита. Овие банкноти тој ги продал во банката со потврда за купување/продавање ефективни странски пари.
Во истиот временски период, искористувајќи ист траен однос тој во повеќе наврати поттикнал уште седуммина обвинети да пуштат во оптек лажни пари во апоени од по 50 американски долари.
Петмина од обвинетите биле негови роднини, еден бил вработен во неговото правно лице, а еден бил лице кое му помага во вршење на помошни работи. Тој им дал вкупно 559 вакви банкноти и ги поттикнал да ги заменат во денари, а потоа добиените средства да ги уплатат на сметка на правните лица кои се во негова сопственост и во сопственост на уште еден од обвинетите.
Обвинетите вработени во банката, од кои двајца шалтерски работници, раководител и заменик раководител на експозитурата во Кавадарци, во наведениот временски период, во повеќе наврати, со неизвршување на својата службена должност, прибавиле значителна имотна корист за обвинетиот.
– Обвинетите шалтерски работници во банката примиле и откупиле вкупно 696 лажни банкноти во апоени од по 50 американски долари, во вкупен износ од 34.800 американски долари. Тоа го направиле без да извршат рачна и машинска обработка на банкнотите за утврдување на нивната автентичност. Раководителот на експозитурата и неговиот заменик не извршиле контрола на почитувањето и спроведувањето на прописите на Народната банка за постапување при размена на девизни средства, со што на штета на банката е исплатен вкупен износ од 1.727.545 денари, се вели во соопштението од ОЈО.
Основното јавно обвинителство Велес, по темелно спроведена истражна постапка и прибавување на обемен број докази, до Oсновниот суд во Велес поднесе Обвинителен акт против едно лице од Кавадарци за „фалсификување пари“ и за „фалсификување пари“ во својство на поттикнувач, против седум други лица за продолжено кривично дело „фалсификување пари“, а против четири лица вработени во експозитура на една банка во Кавадарци за „злоупотреба на службената положба и овластување“.
За обвинетите на сила се претходно определени мерки на претпазливост – повремено јавување кај определено службено лице во Основен суд Кавадарци и привремено одземање на патна или друга исправа за преминување на државната граница, а надлежниот јавен обвинител му предложи на Судот овие мерки да продолжат.