Поздравена одлуката за декриминализирање на клеветата од страна на претставникот на ОБСЕ за слобода на медиумите Дуња Мијатовиќ.
„Како прв чекор во напорите за зајакнување на слободата на медиумите, Собранието на 12 ноември го усвои новиот закон за граѓанска одговорност за навреда и клевета и ги отстрани санкциите за вакви дела од Кривичниот законик. Ова е храбар и многу потребен чекор од страна на властите да започнат да создаваат побезбедна и послободна работна средина за новинарите и медиумите, особено имајќи го предвид големиот број кривични случаи за клевета кои се во моментов во процедура пред судовите. На новинарите мора да им биде овозможено да ги извршуваат своите работни задачи и да дебатираат за прашања од јавен интерес без да имаат страв од кривична санкција или граѓанска отштета без потреба“, рече Мијатовиќ.
Македонија, како што вели Мијатовиќ има преземено позитивни чекори, но оти треба да се направи уште за да се создаде вистински слободна средина за медиумите.
Во иднина се очекува фокусот да биде насочен на решавање на другите предизвици за слободата на медиумите, како што се медиумскиот плурализам, независноста на јавниот радиодифузен сервис и медиумскиот регулатор, како и за транспарентноста на медиумската сопственост.