Објавен е првиот јавен повик за проекти за прекугранична соработка меѓу Република Македонија и Република Косово. Повикот ќе биде отворен до 28 јули, соопшти на денешната прес конференција министерот за локална самоуправа Сухејл Фазлиу.
Во рамките на овој јавен повик на располагање се 2 милиони и 40 илјади евра од страна на Европската Унија за проектите за двете држави.
Кофинансирањето во висина од 15% од искористените средства и за овој јавен повик ќе ги обезбеди Министерството за локална самоуправа.
Ќе можат да аплицираат невладините организации, општините, Центрите на планските региони, универзитети, училишта, бизнис асоцијации и други непрофитни субјекти од Полошкиот, Скопскиот и од Североисточниот плански регион.
Средствата се наменети за проекти во две области:
-Конкурентност и развој на мали и средни претпријатија. За оваа област се наменети 1 милион евра,
-И вториот милион за проекти за поттикнување на туризмот и културното и природното наследство.
До 2020 година, за имплементација на Програмата за прекугранична соработка со Косово на располагање се вкупно 8,5 милиони евра.
– Поддршката од страна на Европската Унија преку ИПА инструментот е многу значајна за Република Македонија. Ќе се залагам да ја искористиме максимално, затоа што реализацијата на овие проекти води кон социјална и економска кохезија на сите граѓани во општеството, како и интегрирање на државата во НАТО и во Европската Унија, што е прв приоритет на оваа Влада, рече на прес конференцијата министерот за локална самоуправа Сухејл Фазлиу.