Претседателот на Собранието на Република Македонија Трајко Вељаноски денеска во новогодишното обраќање им упати на граѓаните желби за многу здравје, бериќет, за стабилност и просперитет на државата, на регионот и пошироко.
– Ја испраќаме 2012 година, која за нас и за светот беше тешка, како економски, така и политички. Пред нас е новата 2013 година во која верувам дека Република Македонија, односно сите ние како граѓани имаме капацитет, имаме знаење и волја да одговориме на сите предизвици. За подинамичен економски развој, за побрзо темпо во нашето интегрирање во евроатлантските интеграции како наша стратешка определба, одговорноста е наша, заедничка, без разлика на која политичка опција и припаѓаме. Согласно надлежностите ќе направам се Парламентот во 2013 година да функционира непречено, во полн состав, со толеранција и почитување на политичките разлики, стои во честитката од спикерот Вељаноски.