Во Кривичниот суд денеска треба да се одржи рочиште за предметот на СЈО „Триста“, во кој обвинет е поранешниот помошник-министер за внатрешни работи Ѓоко Поповски за злоупотреба на службена должност во врска со јавна набавка на 300 возила.
Претходните две рочишта беа одложени поради недоаѓање на Поповски, кој преку своите адвокати достави медицинска документација дека има отворено боледување.
Обвинителката Фатиме Фетаи смета дека не може да се чека со години и судењето да зависи од желбите на обвинетите.
На последното рочиште на кое присуствуваше Поповски, неговиот адвокат Боро Тасевски потенцираше дека обвинетиот дошол во судницата само заради сомневањата во врска со неговата здравствена состојба.
Неговата одбрана побара одложување на судењето за случајот „Триста“ бидејќи обвинетиот се лекувал од депресија и бил под наркотици поради што, за адвокатите не бил во состојба да следи и присуствува на судењето.
Судот за денешната главна расправа го повика лекарот кој го издал боледувањето за Поповски да даде појаснување за здравствената состојба, а дополнително на барање на обвинителството ќе биде повикан и вештак-психијатар да процени дали Поповски може да ги следи судењата.
Поповски се сомничи дека го оштетил буџетот за 453.570 евра. Според СЈО, Поповски незаконски доделил договори за купопродажба и одржување возила на Порше Македонија ДООЕЛ Скопје, Ка-Дис ДОО Скопје, Бохемија Автомобили Роус ДООЕЛ Скопје, Колевски ДОО Скопје и Авто Куќа ДОО Скопје избрани како економски најповолни понуди.
Во овој предмет, Апелацискиот суд одлучи дека прислушуваните разговори може да се користат како доказен материјал.