Со донација од Министерството за транспорт и Светска банка во вредност од 4,2 милиони евра, обезбедени се 49 специјализирани возила и механизација за одржување на комуналната хигиена, објави заменик претседателот на Владата и министер за транспорт, Александар Николоски.
Опремата е наменета за општините и планските региони, со цел подобро и навремено одржување на јавните површини и комуналната инфраструктура.
Возилата ќе се користат во Скопје и Скопскиот плански регион, Куманово и Североисточниот плански регион, Прилеп, Струмица, Штип, Охрид, Тетово, Неготино, Кичево, Дебар и Велес.
„Оваа современа механизација значително ќе ги зајакне капацитетите за одржување на јавната хигиена, ќе овозможи побрзо, поефикасно и поредовно собирање на отпадот и ќе придонесе за почисти улици и поздрава животна средина. Истовремено, Град Скопје со сопствени средства набавува дополнителни специјализирани возила, како и повеќе од 3.300 нови контејнери, за кои постапката е во завршна фаза.Со обновена механизација, нова опрема и подобра организација, му ставаме крај на долгогодишниот проблем со сметот“, напиша на својот профил на Фејсбук, градоначалникот на Скопје Орце Ѓорѓиевски.