Нов вонреден надзор ќе се врши во штипската болница за случајот на 41 – годишната жена која пред да почине во болницата преку повици и пораки од телефон молела да добие кислород. Државниот санитарен и здравствен инспекторат веќе ја утврдил состојбата, но од таму не сакаат во овој момент да изнесуваат детали.
„Предложен е нов стручен надзор од комисија која ќе ја формира министерот за здравство, а во која треба да има повеќе лекари. Сите наоди до кои дојде Државниот санитарен и здравствен инспекторат се предадени во Министерството од каде се очекува формирање на стручната комисија за овој случај“, велат од Државниот санитарен и здравствен инспекторат.
Случајот во јавноста се појави откако ќерката на 41-годишната жена на социјалните мрежи ги објави пораките кои нејзината мајка ги испратила на лекарите и сестрите во болницата пред да почине. Во нив таа моли да и донесат боца кислород.
И директорот на штипската болница Ален Ѓорѓиев најави дека ќе го испитува случајот, но наодите не ги соопшти.
41-годишната жена била примена во штипската болница на 6 ноември, а починала на 14 ноември по компликации од Ковид – 19.