Отворање 11 регионални советувалишта за семејство и брак кои ќе пружаат бесплатна стручна и професионална помош за семејства со проблеми во функционирањето, семејства во услови на социјален ризик, но и за сите аспекти од семејниот живот, предвидува новата владина одлука.
Како што соопшти на денешната прес-конференција владиниот портпарол Александар Ѓорѓиев, целта на проектот е подбврување на функционирањето на семејството и промоција на семејните вредности.
Реформата следи по компаративната анализа од искуствата во оваа област од развиените земји како САД, Канада, западноевропските држави, а во услови на мало зголемување на процентот на разводи со очекување дека ќе се обезбеди поголем опстанок на брачните заедници.
– Со оваа реформа се предвиодува формирање 11 регионални советувалишта за семејство и брак и тоа во Скопје, Велес, Куманово, Гостивар, Кичево, Охрид, Битола, Прилеп, Кавадарци, Струмица и Свети Николе и секој од овие центри би ги опфаќал и жителите на помалите населени места кои гравитираат кон нив, рече Ѓорѓиев.
Барањето услуги во овие регионални центри, во кои ќе работат најстручните лица од центрите за социјални работи, би биле по желба на лицата, а не облигаторно.
Носител на целокупната активност е Министерството за труд и социјална политика кое преку Заводот за социјални дејности во следниот период ќе ја изработи посебната програма за работа на овие регионални советувалишта, а нивното отворање ќе се одвива етапно почнувајќи од месец септември.
За контонуирано подобрување на степенот на професионална услуга и стручност за лицата кои работат во овие советувалишта ќе се спроведат серија обуки по најсовремени стандарди. Ќе се допрецизира и подобри и регулативата која ќе обезбеди полна дискреција на лицата кои барат професионална услуга.