Одговарајќи на новинарско прашање во врска со обвинувањата на министерката Мила Царовска дека ВМРО-ДПМНЕ го опструира законот за дигитални учебници, потпретседателот на ВМРО-ДПМНЕ Александар Николоски вели дека тој закон таков како што сега е напишан, не треба да биде донесен.
-Ако Мила Царовска го обвинува ВМРО-ДПМНЕ дека прави опструкции за носење на овој закон, би рекол дека е во право, затоа што ние сметаме дека тој закон таков каков што е напишан, не треба да биде донесен, рече Николоски.
Според него кога се прави една голема образовна реформа, треба да широк консензус и дијалог со сите засегнати страни.
-Кога се прави една голема образовна реформа, првата работа што треба да се направи е широк општествен консензус и дијалог со сите засегнати страни, и со опозицијата но и со стручната фела, тоа не е направено во овој случај и се турка законот на сила во една нетранспарентна постапка.
Николоски меѓу другото истакна дека таканаречениот дигитален учебник се спротивставува на целиот образовен систем како и на тековите во Европа, посочувајќи ја како пример Франција која забрани употреба на било каков електронски уред на деца до 15 години.
-Досега никој не видел како ќе изгледа тој таканаречен дигитален учебник, а во исто време тоа се спротивставува и на целиот образовен процес и на ако сакате тековите во моментот во Европа. Имено францускиот министер за образование пред неколку дена кажа дека Франција забранува употреба на било каков електронски уред за деца до 15 години, а камо ли да ги ставите учебниците на таблет или на телефон, вели тој.
На крај потпретседателот на ВМРО-ДПМНЕ, Николоски го упати уште еднаш прашањето до министерката Царовска дали овој проект се турка на сила бидејќи вреди 125 милиони евра за 5 години поврзани со фирми од Хрватска.
-И работа за која што Мила Царовска одбегнува да даде одговор иако јас еве 10 дена има откако првпат ја кажав па ја повторив на интервју пред два дена е дали причината зошто го тера и го турка на сила овој проект за дигитални учебници е од лукаративен карактер односно дали причината зошто се обидува да го истурка ова вреди во 5 години 125 милиони евра поврзани со фирми од Хрватска. Еве трет пат правам провокација да одговори дали е оваа причината, праша Николоски.