Судскиот совет го објави годишниот извештај за сработеното за 2017 година. Првичниот впечаток е дека извештајот е формален, а не суштински и не содржи ништо од препораките на Рајнхард Прибе, а проблемите со распределбата на предмети во кривичниот и во Врховниот суд се споменуваат само еднаш во целиот извештај. Нема информација зошто затаила контролата над АКМИС-от во кривичниот суд во Скопје, за местење подобни судии на одредени предмети, бидејќи, меѓу другото, тоа му е законска надлежност.
Во Извештајот пишува дека Советот во 2017 година постапувал по 7 барања за поведување постапка за утврдување на нестручно и несовесно вршење на судиската функција, поднесени од Советот за утврдување на факти и покренување на постапка за утврдување одговорност на судија. За судиите од Врховниот и Апелациониот суд за кои е поведена постапка за разрешување, за ослободувањето од притвор на обвинетиот бизнисмен, Сеад Кочан, пишува дека постапката е во тек. За цела година, Советот утврдил нестручно и несовесно работење на охридски судија, а ги запрел постапките за други двајца судии во кривичниот суд во Скопје, и за судија во Радовиш.
Но, затоа во заклучоците, членовите на Советот напишале дека ќе работеле на активности за јакнење на довербата на јавноста во судството, преку зголемена транспарентност и активности за информирање. Приоритетите на Советот ќе ја гарантирале на независноста на судството, преку унапредување на процедурите за избор и унапредување на судиите, оценување на нивната работа, и на системот за утврдување на одговорност на судиите, како и подобрување на материјално финансиската состојба на судовите, судиите и судскста администрација.
Васко Маглешов
