Македонско научно друштво (МНД) – Битола ја избра доцент д-р Невена Груевска за претседател. Таа е прва жена што ќе го предводи Друштвото во неговото шест децениско постоење.
На изборното Собрание, Груевска најави тимска работа, програмски новитети, задржување на позитивниот тренд и висок рејтинг на Друштвото.
-Во јубилејната година на МНД продолжуваме со учество во локални, национални и меѓународни проекти и активности со научно-истражувачки карактер, ќе одржуваме и поттикнеме одржување на Форуми со иинтерактивен пристап на стручната и општата јавност, ќе ја продлабочиме соработката со други научни друштва од државата и странство, и ќе имаме активна партиципација во програмите за образование и култура на општините од регионот, рече Груевска по изборот.
На редовното годишно Собрание, членовите на МНД го усвоија извештајот за работа во периодот 2018-2020 година и избраа нови членови на Управниот и Надзорниот одбор. Избрани беа и Уредувачки совет, како и Етичка комисија со мандат од две години, до 2022-ра.