Во Центарот за управување со кризи засега нема пријави за штети од земјотресите во Албанија. Од таму најавија дека дополнително ќе ја информираат јавноста во текот на денот доколку добијат пријава на штета.
Сеизомолошката опсерваторија при Природно-математичкиот факултет во Скопје и официјално соопшти дека утрово се регистрирани серија земјотреси, чии епицентри потекнуваат од соседна Република Албанија, од подрачјето на Драч, на растојание 170 km југозападно од Скопје.
„Најсилен досега од оваа серија е земјотресот во 03:54 часот со локална Рихтерова магнитуда од 6.3 и беше почувствуван на целата територија на Републиката. Според досегашните податоци земјотресот е почувствуван со интензитет од V степени според Европската макросеизмичка скала во западните делови на Републиката односно во Охрид, Струга, Дебар, Гостивар и Тетово, IV-V степени во Скопје, Кичево, Битола и со интензитет од III-IV степени според истата скала во источните делови“, известија од Сеизмолошката опсерваторија.
Од Центарот за управување со кризи велат дека граѓаните засега само сакаат да се информираат за земјотресите и за тоа од каде е нивниот епицентар.
Во Албанија медиумите јавуваат за најмалку шест жртви од серијата земјотреси и големи материјални штети.