Општина Неготино денеска се вклучи во акцијата за средување, чистење и разубавување на животната средина. Оваа акција е дел од иницијативата на ЗЕЛС за подобрување на животната средина во сите општини.
Неготинскиот градоначалник Тони Делков и вработените во локалната администрација со асистенција на ЈП „Комуналец“ спроведоа заедничка акција за отстранување на сметот и разубавување на градот. Со работна рака и со помош на механизација, од страна на учесниците во акцијата комплетно беше исчистен потегот на булеварот „Маршал Тито“ од двете страни, од Полициската станица до надвозникот и просторот на влезот и излезот на Неготино, делот околу Спортско- рекреативниот центар „Младост“, градскиот кеј, потегот кај бензинската станица и други локации.
Градоначалникот Делков истакна дека ваквите акции му се потребни на Неготино и треба да се одржуваат почесто.
– Со единствена цел, да го разубавиме нашиот град во кој живееме и дејствуваме и да се избориме за почиста животна средина за сегашните и идните генерации во општината, рече Делков.
Тој додаде дека локалната самоупорава во секој момент е подготвена не само да се вклучи во ваквите и слични акции за расчистување на градот, туку и да даде секаков вид поддршка за сите заинтересирани.