Националната демократска преродба денеска ја обвини локалната самоуправа за отпуштањата на 90 лица вработени во училиштата во Гостивар.
– Наместо професорите и учениците успешно да си ја пoчнат учебната година, се случи незаконска и непедагошка интервенција од страна на нелегитимната општинска власт во секторот образование, истакна на денешната прес-конференција пратеникот од Националната демократска преродба Наџи Џелили.
Според него, од политички реваншизам пред време раскинати се договорите со 70 превозници на ученици, а од ЈП „Комуналец“ се отпуштени над сто лица. Со тоа, како што рече, е загрозена егзистенцијата на повеќе од петстотини лица.
Џелили постапките на гостиваркисот градоначалник Невзат Бејта ги оцени како одмазнички и насочени кон неговите политички противници. Најави дека оваа ситуација ќе ја изложи како пратеничко прашање до министрите за образование и за труд и социјална политика и додаде оти заштита ќе бара и од дипломатскиот кор во земјата.