„Народно движење за Македонија ја поздравува вчерашната иницијатива на ВМРО-ДПМНЕ за амнестија на граѓаните учесници во настаните на 27 април во Собранието на Република Македонија бидејќи претставува своевидна подршка на предлог-законот на НДМ за амнестија, поднесен во Собранието уште на 21 мај годинава.
Да потсетиме, Талат Џафери спротивно на Уставот и Деловникот три пати ги враќа материјалите и ја спречува законодавната иницијатива на НДМ за амнестија поради негова лична суета, односно поради фуснотата во поднесокот во која се вели дека НДМ не го признава изборот на Талат Џафери за претседател на Собранието се до уставната оценка за негов избор од страна на Уставниот суд, иако личната суета не е пропишана како причина во Деловникот на Собранието за кочење на законодавните иницијативи.
Како и да е, најбитно е да ги потсетиме колегите од ВМРО-ДПМНЕ дека во Собранието веќе има готов текст на НДМ за закон за амнестија, кој, на 11 август годинава е доставен и до сите дест пратенички групи на ВМРО-ДПМНЕ.
Затоа, ги повикуваме пратениците на ВМРО-ДПМНЕ на наредната собраниска седница како овластени предлагачи да го процесуираат предлог-законот на НДМ за амнестија на граѓаните учесници во настаните на 27 април во Собранието на Република Македонија“, се вели во соопштението на НДМ.
