Кандидатот за градоначалник на Ѓорче Петров од „Сојузот за иднината“ Александар Наумоски бара извинување од порталите „Курир“ и „Нетпрес“ за објавената информација дека тој се обидел да го нападне градоначалникот на Скопје, Коце Трајановски.
„Демантираме дека кандидатот за градоначалник Александар Наумоски се обидел да ги нападне Коце Трајановски и Сокол Митровски како и дека бил во алкохолизирана состојба. Од видеото поставено на Јутјуб, очигледно е дека Наумоски разговара со Трајановски и води дебата пред насобраните граѓани. Бараме јавно извинување од порталите Нетпрес и Курир. Во спротивно ќе треба да се соочат со тужба за клевета и навреда согласно позитивните законски прописи. На суд ќе треба да докажат дали Наумоски бил во алкохолизирана состојба и дали симпатизери на СДСМ се обиделе да го нападнат Коце Трајановски“ – велат во писмено соопштение од Центарот за комуникации на ОО СДСМ-Ѓорче Петров.