Денеска, во просториите на ЈУОДГ „Распеана младост“ се одржа трибина на тема „Воспитувач и наставник во современи услови“ во организација на раководството на градинката, а со поддршка од Општина Карпош и од Бирото за развој.
Гости на тематската расправа беа градоначалникот на Општина Карпош, Стевчо Јакимовски, претставници на Бирото за развој, членови на Управниот одбор и на Советот на родители на градинката, претставници од другите градинки во Општина Карпош, како и претставници на педагошките факултети од земјава.
Расправата ја отвори директорката на ЈУОДГ „Распеана младост“, Ели Грибовска, која истакна дека соработката со Општина Карпош и со другите градинки на нејзина територија е на завидно ниво, како и соработката со родителите и со другите институции што се инволвирани во процесот на образованието и воспитувањето на децата.
Во тематската расправа се вклучија проф.д-р Јелица Николовска, проф. д-р Лена Димовска, проректор на Филозофскиот факултет, проф. д-р Атанас Николовски, како и претставници на градинките од Општина Карпош. Меѓу другите заклучоци што произлегоа од расправата беше истакнато и тоа дека кадарот на градинките во Општина Карпош е извонредно добро подготвен за секојдневната работа и за предизвиците што ги носи таа. Сепак има потреба од надградување на полето на интеркултурното образование, инклузивното и интерактивното воспитување, како и во други области што ги наметнува современиот тек на живеењето.