На стрелиштето „Стенковец“ денеска се реализира завршната вежба за обезбедување високи воени раководители.
Оваа вежба е завршница на тринеделната заедничка обука помеѓу баталјонот за Специјални намени од составот на полкот за специјални операции и Вооружените сили на Република Турција. Заедничката обука и размената на искуствата која се реализираше, соопшти денеска МО, е дел од програмата за билатерална воена соработка за 2013 година.
Вооружените сили на Република Турција како еден од нашите искрени пријатели и поддржувачи, стои во соопштението, несебично ги сподели искуствата од доменот на обезбедувањето на високи воени раководители.
Во изминатиот период припадниците на баталјонот за Специјална намена и припадниците на Вооружените сили на Република Турција разменија искуства во теми како што се обезбедување високи воени раководители во движење, на отворени простории како и обезбедувања на специфични локации како што се конференции, состаноци и друго.