Четириесет и тригодишен српски државјанин кој одгледува канабис во Струмица, му се заканува затворска казна од шест месеци до три години. Причина за тоа е што тој не го испочитувал Законот за контрола на опојни дроги и психотропни супстанци.
Србинот, како што велат од МВР, не ги пријавил до Министерството за здравство и Министерството за земјоделство настанатите промени во одгледување на конопот.
Освен затворска казна за Србинот, на фирмата и се заканува парична казна.
Од полицијата велат дека е поднесена кривична пријава против В.П.(43) од Србија, со привремено престојувалиште во Гевгелија и правно лице од тој град, поради постоење основано сомнение за сторени кривични дела казниви од Законот за опојни дроги и психотропни супстанци.
„Пријавениот В.П. на 15.2.2023 не постапил согласно Законот за контрола на опојни дроги и психотропни супстанци, така што не ги евидентирал и пријавил до Министерството за здравство и Министерството за земјоделство, шумарство и водостопанство сите настанати промени и отстапувања во одгледувањето на канабисот, кои биле претходно планирани во елаборатот“, велат од полицијата.