На почетокот од денешната седница на Собранието на РСМ пратениците од ДУИ со оглед на ситуацијата со ИВЗ и вчерашната пресуда за убиството на 20 годишниот Никола Саздовски, велејќи дека има селективна правда во државата, побараа Законот за Судскиот совет да биде ставен како прва точка на дневен ред и денеска да биде изгласан. Ова барање беше поддржано од пратеничката група на ВМРО-ДПМНЕ, но по паузата, предлог не беше изгласан. Точката за Законот за Судски совет остана како последна и денеска воопшто нема да дојде на дневен ред.
-На почетокот направија лажна кавга, да се стекне впечаток дека сите се за реформи во судството, но по ова што го видовме изгледа никој не ги посакува и на никому не му одговараат тие промени, велат за А1он извори од пратеничките клупи.
И Претседателот на ЛДП, Горан Милевски по овој театар во Собранието се огласи на социјалните мрежи.
– Со политички игри, повторно одложено донесувањето на дополнителниот Предлог на Законот за Судскиот совет. Реформите во судството повторно одложени. Опомената од првиот круг не сум сигурен дека ја разбравме, напиша Милевски.
Законот за Судски совет веќе еднаш беше изгласан во Собранието, но откако претседателот Иванов пред повеќе од еден месец одби да го потпише, истиот е вратен на прегласување во парламентот.
Виктор Јованов