На Детска хирургија вчера е направена стотата кардиохируршка операција кај деца. Херојот е седуммесечно машко бебе од Скопје, со дијагноза тетралогија, пренесе „Здравство24“.
Интервенцијата ја изведе петнаесетчлениот американски тим од хирурзи, интернисти, кардиолози, перфузионисти и медицински сестри. Со нив во салата присуствуваше и македонски тим од Детска хирургија и од Клиниката за детски болести.
Американскиот тим кој ја направи стотата операција ќе биде во земјава до недела, до кога на списокот имаат уште две деца за операција. Следната кардиохируршка мисија е во февруари. Тогаш, најверојатно, ќе има и деца за операција од Албанија, а во тек се и преговори со Косово. Со тоа, според лекарите, се отвораат вратите за Македонија да стане регионален центар за кардиохирургија кај деца.