Декриминализација и легализација на поседување и лична употреба, декриминализација на одгледувањето на растенија за лична употреба, разгледување можности за основање и работење на социјални клубови, се дел од точките што ќе ги разгледува „Работна група за подготовка на измени и дополнувања на законодавството за декриминализација, легализација и искористување на медицинските, социјалните и економските придобивки на канабисот”.
Оваа работна група е составена од институции, здруженија и граѓански организации, а врз основа на доставените барања и предлози од различните чинители до Канцеларијата на претседателот на Владата на Република Северна Македонија, стои во објавата на Владата од последната седница.
Останатите прашања за либерализација на Законот се зголемување на бројот на здравствени состојби за кои можат да се користи канабис, потоа дозвола за лекари од приватното здравство да препишуваат препарати од канабис и можност пациентот кој добил препорака за лекување со препарати од канабис да може сам да си одгледа и користи во форма во која најмногу му одговара за неговата состојба (орално, преку инхалација или преку супозитории).
Мандатот на работната група ќе ги опфати овие прашања поврзани со регулација на производство и употреба на билката канабис а ќе биде основана Агенција за канабис.
Од Владата предлагаат и формирање Фонд од давачките/даноците кои компаниите кои произведуваат и тргуваат со канабис да ги плаќаат кон државата, со цел поддршка на проекти од општествен интерес во сферата на лекување на ретки болести, медиуми, медиумски работници и продукција на домашни медиумски содржини, граѓанското општество, културата и спортот, како и за поддршка на работата на Агенцијата за канабис.
А1он вчера објави дека активистите ја обвинуваат Владата за тоа што ЦБД сортата е тргната од листата на наркотици од Светската здравствена организација и Обединетите нации, а кај нас таа и покрај усогласување на листите со меѓународните правила, и натаму има третман на дрога.