Министерството за здравство реагира на изјавата на Андреј Петров.
„Како резултат на негативната кампања на вашата партија, сакате да постигнете два ефекта. Првиот е политички, кој претпоставува да се генерира негативна политичка перцепција за овој проект. Вториот ефект e да ги заштитите здравствените работници, докторите од имплементацијата на овој проект. Дали е чесно некој доктор да се „отепа“ од работа, да има многу поголем број на пациенти, целото работно време да биде посветен на пациентите и на крајот на месецот да земе иста плата како и оној доктор кој ескивира, не е посветен на пациентите и веќе во 12 часот ја заклучил својата ординација “, стои во реакцијата на Министерството.
„Оној кој работел повеќе од другите да биде награден, а оној кој не работел или работел далеку помалку од другите да биде казнет, а директорот со ништо да не може од политички, лични, пријателски, роднински или кои било други причини некого да повласти или неоправдано да казни. Во исто време системот е така дизајниран доколку, како што се тврди, сите доктори работат подеднакво, сите да земат иста плата, 100 отсто од нивната плата. Сметаме дека ова е чесно и праведно, и за докторите и уште повеќе за пациентите, кои пак ќе бидат директни бенефитори од овој концепт – помалку ќе чекаат пред вратите на ординациите, ќе добијат побрза здравствена услуга“, стои во реакцијата .