Раководство на МВР e отворено за соработка со синдикатите, без разлика на репрезентативноста, и тоа се гледа не само по бројните средби, туку и со преземените активности, е одговорот од МВР на денешното барање од Независниот синдикат на полицијата, кој денеска организираше синдикален марш со барање да им се признае репрезентативноста и да се вклучи во социјален дијалог.
– Секој реален предлог што доаѓа од синдикалните организации за подобрување на условите за работа на полициските службеници го прифаќаме и реализираме. Јавноста во изминатиот период беше сведок на реновирањето на десетина полициски станици и други објекти, како и набавка на униформи и друга опрема за да се овозможат подобри услови за работа на полициските службеници. Минатата недела нови униформи доби Единицата за специјални задачи, а деновиве се дистрибуираат униформите и за други полициски службеници, изјави денеска портпаролот на МВР Тони Ангеловски.
Министерството за внатрешни работи во периодот од јуни 2017 година досега, нагласи Ангеловски, постојано работи на подобрување на условите за работа на полициските службеници, нешто што не е правено цела деценија, па полициските службеници беа доведени во ситуација да работат во субстандардни услови и без потребната опрема и униформи.
Покрај тоа, најави, од 1 декември оваа година ќе бидат зголемени и платите на полициските службеници.
– Потенцираме дека и натаму интензивно ќе вложуваме во подобрувањето на условите за работа на полициските службеници, затоа што на тој начин ќе ги подобриме и резултатите во работата, од што бенефит ќе имаат граѓаните на Република Македонија, рече портпаролот во МВР Тони Ангеловски.