Министерството за внатрешни работи денеска преку соопштение информира дека почнало да работи на нова кривична пријава против лицето кое во рамките на случајот „Пуч“ е осомничено за насилство спрема претставници на највисоките државни органи и за поткуп (Зоран Заев н.з.).
Новата кривична пријава која МВР му ја подготвува на Заев, како што е наведено во соопштението, се однесува на кривичното дело оддавање државна тајна, а во врска со снимките што лидерот на опозицијата ги објави на вчерашната прес-конференција.
„Лицето на вчерашната срамна и недостојна прес-конференција изнесе бројни конструкции и лаги. Тоа што е уште поважно, презентираше детали од договор за донација кој е класифициран со најголем степен на тајност, односно „државна тајна“. Преку својот недоличен настап, осомничениот во случајот „Пуч“ го загрози кредибилитетот на македонските служби, со што и директно ја доведе во опасност безбедноста на Република Македонија. Освен кон македонските институции, со овој бесрамен чин, беше извршен атак и кон институции на држава, стратегиски партнер на Република Македонија. Тој и практично, неосновано и недолично ја обвини државата Израел дека исплаќала поткуп за да донира средства“, стои во соопштението од МВР.
За ова кривично дело е предвидена затворска казна до 10 години.