Министерството за внатрешни работи е отворено за разговор и изнаоѓање решенија за секое барање или предлог на синдикалните организации на полициските службеници и други вработени во институцијата, соопшти МВР во врска со денешниот протест на Независниот синдикат на полицијата.
Тие ги повикаа претставниците на полициските синдикати на заедничка средба на која ќе бидат дискутирани сите проблеми.
– По доаѓањето на актуелното раководство на МВР преземени се низа чекори за подобрување на условите за работа на вработените во Министерството. Во тек се конкретни активности за подобрување на стандардот на работење на полициските службеници, почнувајќи од набавка на основната полициска опрема, како што се униформи и чизми, нешто што се нема случено речиси цела деценија, се вели во соопштението на МВР.
Нагласуваат дека досега не ниту одбиле каков и да е синдикален предлог, ниту пак имаат намера во решавањето на проблемите да ги исклучи полициските синдикати. – Напротив, сметаме дека само заеднички можеме да дојдеме до најоптималните решенија, истакнуваат од МВР.
