Договорот од Пржино е пред дефинитивен колапс. Денешниот, последен рок, поставен од белгискиот посредник Питер Ванхауте, не се случи ништо, шансите за договор се минимални.
Од преговарачките тимови, за А1он велат дека нема најава и за состаноци на работните групи, но и дека Договорот од Пржино не е тоалетна хартија. Се ќе биде познато до вторник, кога Европската комисија треба да го затвори Извештајот за напредокот на Република Македонија.
Груевски на прославата на Денот на ВМРО-ДПМНЕ, побара седми позитивен извештај од Брисел и седма препорака и датум за почеток на преговори.
За можното губење на препораката, поради политичката криза, Груевски рече дека народот нема да го доживее трагично бидејќи таа би била бесмислена ако нема почеток на преговори.
Губењето на препораката ќе значи и стопирање на средствата од Европските фондови.
Додека Белоруското сценарио, како што најави Ванхауте, е многу извесно, шанси за итна лидерска средба и брзи договори нема, премиерот и лидерот на ВМРО-ДПМНЕ Никола Груевски замина за Обединетите Арапски Емирати.
Иако работата запна со неизборот на целиот тим на специјалната обвинителка Катица Јанева, сепак вистинскиот проблем е назначувањето на прв човек во Министерството за внатрешни работи од опозицијата, и барањето тој да има реални, а не ингеренции на хартија. На сите им е јасна значајната улога кој МВР ја има во изборниот процес.
Само неколку часа по неуспешната лидерска средба, вчера лидерот на опозицијата Зоран Заев пак, преку својот ФБ профил , упати порака и до Груевски и до меѓународната заедница.
„Тик-так“, напиша Заев, индиректно укажувајќи дека Договорот од Пржино тешко ќе се реализира, и затоа повторно ќе се започне со објавување на ,, бомбите“.
И ВМРО-ДПМНЕ најавуваат планови, но не откриваат какви.