Граѓанската асоцијација МОСТ, во рамки на кампањата „Вклучи се, ако си исклучен!“, денеска ќе организира отворен настан во Скопје пред Книжарница во Чаршија (Либрариа Е Çарсхисë), на кој заинтересираните млади ќе можат да се информираат и да ги прошират своите знаења за предностите да се биде активен граѓанин.
Кампањата почна на 15 септември како симболично одбележување на Меѓународниот ден на демократија и е дел од проектот „Активни за демократија“ што претставува продолжување на долгорочните напори на МОСТ за подигнување на свеста кај младите гласачи и зголемување на нивниот активизам. Досега беа организирани 10 настани во различни градови во државата, а планирано е да се оранизираат уште толку за да се опфатат и информираат што поголем број млади.
Главните предизвици кои ги адресира проектот „Активни за демократија“ се недостатокот од познавање теми поврзани со изборите, како и нискиот степен на заинтересираност за активно учество во демократските процеси. Проектот укажува и на недостатоците во формалното образование за соодветно информирање на младите гласачи. Во таа насока, има за цел да даде придонес кон зајакнување на капацитетите на младите преку промоција на нивните права и слободи поврзани со изборите, како и преку промоција на потребата од активно учество во демократските процеси.
Проектот вреден околу 83.000 евра го финансира ЕУ преку Европскиот инструмент за демократија и човекови права (ЕИДХР).