Студентите и професорите од насоката Индустриски дизајн на Машинскиот факултет во Скопје на платформата Мајкрософт тимс промовираа дигитална монографија „Имагинација >> Дизајн << Технологија“ и изложба со избрани дела на студентите од неколку претходни академски години.
Презентирани се најновите иновативни дизајни на светилки, мебел, техника, играчки, декоративни предмети и низа други производи изработени од вештите раце на младите дизајнери. Во процесот се применети дизајнерски методи за анализа и прибирање податоци, а сето тоа е преточено во уникатни производи со користење современи алатки и техники.
Проф.д-р Татјана Кандикјан на отворањето истакна дека изложбата и монографијата се увид за напредокот на студиите и студентите од Индустриски дизајн и покажува пример за создавање уште подобри креативни проекти во наредните генерации.
– Најзаслужни за овие проекти се студентите кои се непресушен извор на идеи, професорите кои ги насочуваат и им даваат поддршка и фирмите кои помагаат во нивната реализација. Се надевам дека оваа изложба ќе им биде портфолио на нашите студенти за нивните идни успеси, вработувања, нивниот професионален развој, истакна проф.д-р Кандикјан.
Професорите се надеваат дека иновативните проекти на студентите од насоката Индустриски дизајн ќе бидат предизвик за компаниите. Проф. д-р Софија Сидоренко порача дека е горда на големата енергија и ентузијазам кои ги вложуваат студентите, а предизвиците им стануваат секојдневие.
Промоцијата и изложбата ги отвори деканот на Машинскиот факултет, проф. д-р Дарко Данев, кој истакна дека во овие тешки времиња, настанот е светла точка и покажува дека кој сака да се вложи, може и да блесне.
Насоката Индустриски дизајн на Машинскиот факултет е основана во учебната 2003/2004 година. Студентите се активни учесници на многу настани од областа на дизајнот, како Саемот на мебел, Скопје Креатива, Недела на дизајнот во Скопје, Миксер – фестивал на креативни уметности во Белград, Недела на дизајн во Пловдив, D Day – недела на дизајн во Загреб, Недела на дизајнот во Милано.
За успешноста на студентите сведочат и голем број награди на национални и меѓунардни натпревари, меѓу кои: Макинова, Еконова, Интернационален натпревар во SolidWorks…
Повеќе информации за работата на насоката и студентите се достапни на веб-страницата на насоката Индустриски дизајн design.mf.edu.mk.