По повод 22 Мај, Меѓународниот ден на биолошката разновидност, денеска во ресенското село Стење свечено ќе биде пуштена во употреба Првата мониторинг станица за испитување и следење на квалитетот на водите на Преспанското Езеро.
Воедно ќе се организира и посета на единствениот остров во Македонија – Голем Град, каде што ќе биде организирана изложба на сликарката Кристина Зимбакова под наслов „Микориза“.
На свеченото отворањето се очекува да се обратат министерот за животна средина и просторно планирање Нурхан Изаири, ресенскиот градоначалник Ѓоко Стрезовски, постојаниот претставник на Програмата за развој на Обединетите нации (УНДП) Луиза Винтон, и швајцарскиот амбасадор Стефано Лазарото.