Македонско научно друштво – Битола директно, со свој претставник ќе учествува во работата на Советот за соработка и развој на граѓанскиот сектор во кој членуваат 15 претставници од владините министерства и 16 претставници на граѓански организации.
На конституивната седница на Советот, што вчера се одржа во Владата на Република Македонија, тригодишен мандат доби универзитетската професорка Мимоза Богданоска Јовановска, член на МНД-Битола, избрана за секторот наука, образование и доживотно учење, посочи претседателот на МНД-Битола, Марјан Танушевски и тоа се случува првпат во историја на МНД-Битола да има можност директно да влијае, да ги креира јавните политики поврзани со граѓанскиот сектор и да придонесува за силен инклузивен дијалог со јавните власти.
Изборот на претставникот на МНД-Битола го направија здруженијата на граѓани од цела држава по пат на гласање и врз основа на предложена програма за секторот наука, образование и доживотно учење.
– Нашата намера е да дадеме што повеќе предлози, информации и различни мислења до Владата на Република Македонија. Во секторот каде што сум избрана, односно за наука, образование и доживотно учење ќе понудиме вмрежување на граѓанските организации од областа каде што ние дејствуваме, да се фокусираме на актуелните проблеми и истите да ги решаваме. Во мандатниот период од три години ќе изработиме јасна платформа која ќе обезбеди поголема проактивност и развој на граѓанскиот сектор во државата. На овој начин уверени сме дека како МНД-Битола ќе дадеме директен придонес во евроинтегративните процеси, нагласи вонреден професор Мимоза Богданоска Јовановска, избран член на националниот Совет за соработка и развој на граѓанските организации.
Членовите на Советот за соработка и развој на граѓанскиот сектор беа избрани со одлука на Владата на Република Македонија и со мандат од 3 години.