Од 1. март односно од следниот викенд почнува реализацијата на мерката за бесплатен железнички превоз за млади до 27 години возраст.
Со оваа мерка, појасни денеска претседателот на ВМРО – ДПМНЕ Никола Груевски, младите ќе можат покрај третиот викенд во месецот како мерка воведена во 2014 година, секој прв викенд во месецот да користат бесплатен железнички превоз од петок во 12 часот на пладне до понеделник на пладне.
– Тоа е извонредна можност затоа што оваа мерка што досега ја воведовме во оваа година и пол или две, укажа дека 52 илјади млади лица ја искористиле можноста и заштедиле околу 18 милиони денари. Тоа е голема заштеда за младите лица, коишто не располагаат со големи средства затоа што се во развој, студираат, а многу од нив не се вработени и зависат од нивните родители, така што кога ќе им се овозможи такво нешто, тоа за нив е доста значајно и ја зголемува нивната мобилност и ги прави сриозни заштеди, изјави Груевски, кој заедно со заменик-министерот за образование и наука Спиро Ристовски присуствуваше на денешната промоција на нови наслови од проектот „Превод на 1000 стручни и научни книги“.