Ирена Мишева од коалицијата „За подобра Македонија“ беше денеска избрана по трет пат да претседателствува со Советот на Град Скопје, кој по локалните избори е структуриран со 22 советници од владејачката партија, 14 од коалицијата „Сојуз за иднината“, 5 од ДУИ, 3 од ДПА и еден член од ДОМ.
За изборот на Мишева гласаа 30 советници и нејзината кандидатура ја поддржаа советниците од ДУИ и од ДПА, додека советниците од СДСМ се спротивставија на предлогот таа да се постави по трет пат за претседател.
– Кај кандидатот во изминатиот мандат беше забележан конфликт на интереси. За време на својот мандат таа го вработи својот сопруг во јавно претпријатие кое е основано од Град Скопје. Редот за време на нејзиниот мандат не беше на потребно ниво, што е причина да не го поддржиме овој предлог. Во советничката група на СДСМ има луѓе кои немаат црни петна во минатото и се соодветни за местото да го водат овој Совет – рече Софија Куновска, советник од СДСМ.