Како во училиште, професорот испитува, а учениците одговараат. Така главно до сега тече отворената владина седница. Со тоа што за разлика од училиште кога се испитува, овде премиерот, главно покажува солидно знаење и се истакнува повеќе од министрите. Тој прашува, дополнува, сугерира, бара и одредува рокови.
Министрите досега покажаа добра кондициска подготовка , но ќе треба да се издржи, бидејќи седницата може да трае и до доцна вечер или до раните утрински часови. На дневен ред се стотината точки, а испрашувани ќе бидат освен министрите и директорите.
Досега кај премиерот преодна оценка добија министрите за здравство и за информатичко општество. Добро воден од премиерот, Тодоров, успешно се претстави во јавноста, таму многу се работи, реформите се спроведуваат , добро оди и плаќањето по учинок, набавена е и солидна опрема а сега лекарите и медицинските сестри ќе се обучуваат во странство. Но ниту збор немаше за штрајкот на лекарите.
Добро течат и реформите во администрацијата, а граѓаните се задоволни, се пофали Иво Ивановски.
Задоволен е и премиерот од она што го слуша како работат неговите министри, а сите можат да дадат свој суд од директниот пренос на Собранискиот канал на Јавниот сервис.