Министерството за култура ја изразува својата длабока загриженост поради степенот на непознавање и неинформираност на првиот човек на таканаречениот Совет за култура на СДСМ, кој постојано се обидува да ја дефокусира јавноста од успешно спроведените стимулативни мерки и проекти на Министерството за култура, велат од министерството.
Во текстот стои:
Господине Алаѓозовски,
Ве потсетуваме дека резултатите од Конкурсот за превод на автори од РМ на другите странски јазици се во повеќе наврати соопштени јавно и транспарентно, на прес-конференции кои ги организираше Министерството за култура во присуство на голем број автори, стручната комисија и медиумите. Сумите се утврдени според јасно поставени критериуми и мерила од стручна комисија и тие се на ниво на најдобрите европски практики во оваа област, речиси на нивото на најпрестижните грантови, на ТРАДУКИ и Европската комисија. Конкурсот за странски издавачи е само една од стимулативните мерки што ги спроведе Министерството за култура во изминатиот период и навистина радува податокот што оваа мерка беше поздравена од страна на сите автори и институции во Република Македонија.
Република Македонија е една од ретките држави во регионот и пошироко која вложува големи средства во областа на литературната и издавачката дејност. Ќе ве потсетиме на Годишната програма во која редовно се поддржуваат проектите на многу приватни издавачки куќи, меѓу кои и на вашата издавачка куќа „Готен“. Министерството за култура секоја година, континуирано спроведува и откуп на книги со кои се збогатува библиотечниот фонд на установите низ државава.
Исто така, за прв пат во Република Македонија се реализираат и голем број капитални проекти кои ја афирмираат македонската литература и творештво во меѓународни рамки. Ова се реални, мерливи и остварливи проекти, г. Алаѓозовски, и во тој контекст, од позиција од која не можете да понудите контрааргументи или реализирани проекти од ваков вид во времето на вашето владеење, сосема е непотребно да навлегувате во материја која не ви е позната.
Што се однесува до конфликтите, нив ги препознаваме само во вршењето на вашата функција, претседател на Советот за културата на СДСМ, и вашата огромна желба да аплицирате на конкурсите на Министерството за култура од каде што добивате финансиска поддршка за вашите проекти. Ве повикуваме, кога и да посакате, да не посетите во Министерството за култура, каде што ќе можете да ја погледнете целокупната документација од реализацијата на Конкурсот за странски издавачи, а со задоволство ќе ве информираме за високиот степен на реализација на сите проекти од Националната стратегија за развој на културата 2013-2017.