Македонскиот министер за внатрешни работи Агим Нухиу денеска учествуваше на заедничкиот состанок на министрите за одбрана и за внатрешни работи на земјите од Централно-европската одбранбена соработка и Салцбург форумот, кој се одржува во Виена, Австрија.
Во своето обраќање министерот Нухиу изразил благодарност до пријателските земји за финансиската и материјалната поддршка, како и за испраќањето на контингенти составени од полициски службеници во Република Македонија, се наведува во соопштението на МВР.
Министерот Нухиу во своето обраќање, како што стои, посочил дека доколку мигрантската криза се повтори, ќе биде потребно повторно ангажирање на целокупните национални капацитети како и при првиот бран, а многу веројатно и ангажирање на дополнителни капацитети за спречување на илегалното преминување на државната граница.
На состанокот во Виена учествува и македонскиот министер за одбрана Зоран Јолевски.
