Министерот за информатичко општество и администрација Иво Ивановски денеска престојуваше во работна посета на Охрид, каде оствари средба со градоначалникот Никола Бакрачески.
Министерството за информатичко општетсво и администрација (МИОА) соопшти дека Ивановски на средбата бил информиран за активностите на локалната самоуправа на административен план и чекорите што се преземаат за зголемување на ефикасноста на вработените, со цел да се обезбеди поквалитетен сервис за граѓаните.
Градоначалникот Бакрачески ги претставил тековните и идни проекти што се финансиски поддржани од Владата, со посебен осврт на проектите во областа на информатичкиот развој.
Министерот Ивановски нагласил дека наскоро ќе следи и дообука на поголемиот број вработени во општинската администрација преку системите за микроучење и електронско учење, како проекти на МИОА.
– Со оглед на наследениот голем број вработени во администрацијата, меѓу кои има и кадар кој бил вработен со несоодветно образование, а имајќи го предвид капацитетот на општината, се согласивме дека е неопходна дообука на поголемиот број од вработените, што ќе се спроведе преку системот за микроучење. Сите во администрацијата кои доаѓаат на обуки во Министерството се стекнуваат со корисничко име и добиваат инсталација на нивниот компјутер или телефон, со што ќе може да користат дополнителни обуки. Овој систем ќе служи како потсетник за изучуваната материја, а ќе овозможи и постојана надградба на знаењето, рече министерот Ивановски.
Градоначалникот Бакрачески информира дека во завршна фаза е тендерот за набавка на нова информатичка опрема наменета за вработените во локалната општинска администрација, со цел да се воспостави подобра координација на сите одделенија кои функционираат во рамките на општината.