Министерот за одбрана на Република Македонија, Талат Џафери денеска учествуваше на 17-тата меѓународна конференција насловена „НАТО – 20 години партнерство за евро-атлантска и меѓународна безбедност“, што се одржува во Тирана, Република Албанија, во организација на Атлантскиот совет на Албанија и НАТО одделот за јавна дипломатија.
На оваа годишна конференција, соопшти денеска МО, фокусот е ставен на важноста од партнерствата и нивната круцијална улога за мисиите на НАТО во поддршка на мирот и безбедноста.
Министерот Џафери се обрати на втората сесија од оваа конференција на тема „Авганистан – светол пример на успешно партнерство“, при што се осврна на партнерската политика на НАТО и на придонесот на Република Македонија во партнерската политика на Алијансата.
– Партнерството за мир ни овозможи здружено и заедно да се соочиме со бројните предизвици на нашиот пат кон полноправно членство во Алијансата и доследно со заеднички ресурси да одговориме на сите предизвици, рече Џафери.
Тој потенцирал дека Република Македонија, преку макотрпна работа, се докажа како значаен придонесувач во градењето и поддршката на мирот, безбедноста и стабилноста не само во евроатлантската област, туку и пошироко.
На конференцијата во Тирана учестуваше и помошникот на генералниот секретар на НАТО за јавна дипломатија Колинда Грабар Китаровиќ.