Министерот за одбрана Талат Џафери од денеска до 26 јуни ќе учествува на 30. меѓународна работилница за глобална безбедност во Париз, организирана од Истражувачкиот центар за стратешки одлуки.
Работилницата е насловена „Мир и безбедност – предизвици кои претстојат“ и ќе бидат вклучени темите за актуелните воени операции во Мали, настаните во Сирија, решавањето на економската криза, Арапската пролет и повлекувањето од Авганистан. Меѓу клучните теми се очекува да биде и сајбер безбедноста.
Ќе учествуваат претставници од над 30 земји – министри за одбрана, началници на генералштабови и други официјални претставници на политички и воени организации како НАТО, ЕУ, ОН, претставници од одбраната, информатичката технологија, сајбер-безбедноста и од други индустрии.
Работилницата годинава е под покровителство на франускиот министер за одбрана Жан Ив Ле Дриан, во соработка со Институтот за високи студии за национална одбрана.
– Од своето основање оваа работилница еволуирала од мала академска конференција во меѓународен форум. Лидери на влади, академици, водачи на светската индустрија разменуваат идеи за новите политичко-воени политики, информира Министерството за одбрана.