Според поранешниот министерот за надворешни работи Македонија е подготвена да разговара и да работи на изнаоѓање на достоинствено решение
Македонската реплика на грчкиот Меморандум за разбирање е навремена, тактички добро изработена и ги пополнува случајните или намерни пропусти што официјална Атина ги има направено во нејзиниот предлог Меморандум, каде што Грција пристапила кон Времената спогодба и кон Меѓународанта пресуда од Хаг како кон супермаркет во кој човек си зема тоа што му одговара, а го остава настрана тоа што не му одговара, изјави денеска пратеникот и поранешен министер за надворешни работи Антонио Милошоски.
Македонскиот одговор, како што посочи, заслужува внимание заради три пораки. Првата е дека Македонија е подготвена да разговара и да работи на изнаоѓање на достоинствено решение, и тоа не е порака само кон Атина, туку и кон Њујорк и кон Брисел.
Втората порака, според Милошоски, е дека Република Македонија има архивска меморија и знае кои се нашите и кои се грчките преземени обврски особено по однос на Времената спогодба и оти таа треба да најде заслужено внимание и во грчкиот пристап кон македонско-грчките односи.
„И третата порака е доколку се повикуваме на релевантни документи не можеме да замислуваме една рамка на преговори што би ги отсликувала само грчките позиции. Таа ќе мора да ги земе предвид и македонските позиции за да се стигне до заеднички долгорочно одржлив договор, а за да се постигне тој договор мора да ги почитуваме и меѓународно релевантните документи, како што е пресудата од Меѓународниот суд на правдата во Хаг, каде Македонија на многу чист, аргументиран и меѓународно правно издржан начин успеа да ги претстави своите аргументи и да доби една кристално јасна пресуда“, изјави Милошоски.
Најважно, истакна тој, е да видиме дали втората фаза по добивањето на овој Меморандум од декларирани заложби официјална Атина ќе премине и на остварување на своите намери дека ќе влезе во суштински преговори со Република Македонија коишто би имале за цел да се стигне до едно заедничко прифатливо решение.
„ Во секој случај добро е што официјален Брисел оваа година за разлика од претходните македонско-грчкиот спор го смета не како пречка за почнување на преговорите, туку како дополнителен мотив да се отпочнат преговори за членство со ЕУ и да се создаде подобра атмосфера и во самите европско – македонски преговори, но и подобра атмосфера и взамена доверба во македонско грчките односи“, изјави Милошоски.