Транспарентна и брза истрага по неодамнешниот напад на новинар во земјава бара Дуња Мијатовиќ, претставничка на ОБСЕ задолжена за слободата на медиумите, во писмото до министерот за надворешни работи Никола Попоски.
Мијатовиќ пишува дека на 28 јуни, новинарката Корнелија Кребс, која известувала за состојбата со мигрантите за австрискиот јавниот сервис ОРФ, била физички нападната од униформирано службено лице на границата со Грција кое се обидело да и ја земе камерата и другата новинарска опрема. Кребс за инцидентот ја известила полицијата.
„Овој напад е целосно неприфатлив, што претставува директна закана за слободата на медиумите“, му напишала Мијатовиќ на министерот Попоски.
Мијатовиќ потенцира дека „истражувачкото новинарство е еден од столбовите на слободата на медиумите и новинарите мора да бидат слободни за да известуваат за прашања од јавен интерес без страв од насилство. Властите треба јавно да ги осудат овие и сите други напади на новинари и медиумски работници и мора да се обезбеди брза и транспарентна истрага. Не смее да постои неказнивост за напади или за закани против новинарите”, пишува Мијатовиќ во писмото до министерот Поповски.