Лидерот на опозициската ВМРО-ДПМНЕ, Христијан Мицкоски денеска му вети поддршка на премиерот Зоран Заев доколку тој и СДСМ го тргнат од собраниска процедура Законот за употреба на јазиците.
Мицкоски во интервју за ТВ Сител кажа дека има да му порача две работи на премиерот Заев.
– Првата е, ако чесно и мисли добро на Република Македонија и ако навистина се декларира како реформски политичар и политичар кој има примарна цел за реформите, тогаш да продолжиме со процесот на реформи, бидејќи тие се вистинскиот приоритет за развојот на Република Македонија. Ако Заев има концесија, ние како ВМРО-ДПМНЕ му стоиме на располагање и, ако е уценет преку таа концесија дека ќе му се распадне Владата, и ако има „дил“ за да остане Владата, ние како ВМРО-ДПМНЕ му се нудиме, со нашите парламентарни пратеници да ја поддржиме неговата влада во сите овие реформски процеси под еден услов: да го тргне Законот за јазици од собраниска процедура. ВМРО-ДПМНЕ ќе ја поддржи Владата на господинот Зоран Заев во носењето на сите реформски закони, безусловно, бидејќи иднината на оваа држава е во реформите, рече Мицкоски.