Премиерот Христијан Мицкоски изјави дека нема ништо против законско ограничување на двојното државјанство за носителите на јавни функции, доколку тоа е во согласност со Уставот и законите. Тој посочи дека ваквото решение може да се однесува не само на пратениците, туку и на извршната власт и на претседателот на државата.
„Ако правните и уставните експерти проценат дека нема пречки, тогаш апсолутно го поддржувам тоа решение. Јас немам двојно државјанство, ниту планирам да имам. Моето државјанство е македонско и ваквото ограничување не ме засега“, изјави Мицкоски по увидот во реконструкцијата на Универзалната сала во Скопје.
Претходно, Гордана Сиљановска-Давкова истакна дека е можно со закон да се ограничи двојното државјанство, но предложи тоа да важи не само за пратениците, туку и за министрите и шефот на државата.
Во меѓувреме, во Собранието веќе се поднесени предлог-закони на оваа тема. Пратеници од владејачката коалиција предложија забрана за двојно државјанство за пратениците, додека СДСМ излезе со предлог ограничувањето да се прошири и на министрите и вицепремиерите, со негово веднаш стапување во сила.
Темата за двојното државјанство повторно се отвора како дел од пошироката дебата за критериумите и одговорноста на носителите на јавни функции.