Средбата во Владата на новиот лидер на ВМРО-ДПМНЕ, Христијан Мицкоски, со премиерот и лидер на СДСМ, Зоран Заев, траеше еден и пол час. Мицкоски изјави дека иницијативата за средбата била на премиерот.
Тој рече дека разговарале за многу образовни, економски и здравствени теми. На прашање дали тема на разговор биле и притворените пратеници на ВМРО-ДПМНЕ, Мицкоски повтори дека разговарале за актуелни теми.
Во однос на враќањето на пратениците на опозициската ВМРО-ДПМНЕ во Собранието, Мицкоски рече дека веднаш по средбата со Заев, ќе присуствува на средба со пратеничката група по што ќе се знае какви ќе бидат натамошните чекори и на каков начин ќе дејствуваат пратениците во Собранието.
„Јас сум оптимист, а некои ме сметаат дури за утопист“, рече Мицкоски и додаде дека утре од партијата ќе испратат соопштение во врска со состанокот со пратеничката група.
Мицкоски рече дека дијалогот помеѓу власта и опозицијата никогаш не бил закочен. Вакви, како што рече, конструктивни средби, очекува и во иднина.
Од владата соопштија дека премиерот Заев и Мицкоски се согласиле дека е потребно учество на опозицијата во реформските процеси и дека за остварување на евроатлантските аспирации потребен е ангажман од сите политички субјекти.
В. Маглешов