Општина Крушево му додели на А.Д. МЕПСО највисоко признание за особени заслуги за афирмација и поддршка на развојот, за донацијата од 1,29 милиони евра, за модернизација на скијачкиот центар „Крушево“.
Градоначалникот на Крушево, Ѓорѓи Дамчевски денеска му ја додели плакетата „8 Септември“ на генералниот директор на МЕПСО Синиша Спасов на свечената седница на Советот на општина Крушево што се одржа по повод Денот на независноста на Република Македонија и денот на ослободување на градот Крушево.
– Со гордост ќе кажам дека скијачкиот центар „Крушево“ ќе биде една од топ зимски дестинациите во Република Македонија. Проектот е во финална фаза на реализација и се планира новата опрема за создавање вештачки снег и осветлувањето на патеките да бидат во функција во претстојната скијачка сезона, истакна Спасов во обраќањето пред советниците на општина Крушево.
Проектот е дел од Програмата за општествена одговорност на А.Д. МЕПСО за финансирање проекти од јавен интерес, одобрена и поддржана од Владата. Станува збор за донација во вредност од 79,6 милиони денари наменети за збогатување на содржините и туристичката понуда на скијачкиот центар „Крушево“. Во рамки на проектот е вклучена изградба на акумулација за вода од која ќе се произведува вештачки снег, инсталација на систем од топови за производство на снег на две скијачки патеки во центарот.
Воедно е предвидено комплетно осветлување на две скијачки патеки и нивна адаптација за ноќно скијање и изградба на парк за сноубординг во кој ќе бидат поставени монтажни рампи и елементи за акробатски сноуборд. За потребите на ски центарот „Крушево“ се набавени возило за уредување на снегот на ски-патеките (т.н. ратрак) и моторна санка за потребите на службата за спасување и персоналот на ски центарот „Крушево“.Изведувач на работите е фирмата „Енерго систем“.
– Новата инфраструктура ќе ја збогати понудата на скијачкиот центар „Крушево“ со воведување ноќно скијање и скијање во сноуборд паркот на една од двете патеки. Инсталацијата на системот за вештачки снег ќе ја направи скијачката сезона подолготрајна што ќе придонесе за рентабилното работење на овој скијачки комплекс. Овој проект има пошироко значење за економски раст на Крушево град кој и сега има познатлив имиџ на скијачки центар. Сите овие процеси за збогатување на понудата, за продолжување на скијачката сезона се очекува да овозможат отворање нови работни места во туристичката понуда на ски центарот „Крушево“, стои во соопштението од АД МЕПСО.