Политичките партии да ги поштедат децата од какво било инволвирање во политичките кампањи и политичкиот маркетинг независно дали се работи за нивно носење на митинзи, облекување во обележја од одредена политичка партија, користење за делење флаери или лепење постери, сликање или користење детски мотиви, фотографирање со деца или снимање видеа со деца, апелира денеска Првата детска амбасада во светот Меѓаши.
Воедно бара политичките партии, кандидатите на локалните избори за советници и градоначалници, родителите и старателите, да ги почитуват законите и Конвенцијата за детските права.
– Политичка злоупотреба на децата подразбира политичка присила и организирање на децата како инструмент за политички притисок. Тоа не смее да си го дозволи ниту еден политичар или кандидат/ка за изборите. Детето не е објект на кој возрасните ќе му кажуваат што да прави. Детето е рамноправен граѓанин како и сите други и така треба да биде третирано, потенцира Меѓаши.
Како рамноправни граѓани, децата, дополнува Првата амбасада, имаат право да бидат информирани што се случува во државата, зашто тоа директно ги засега и можеби повеќе и од сите нас возрасните, бидејќи иднината на земјата останува на нив.
– Но, носењето и учеството на деца како декор на настани со партиска позадина и агенда е политичка злоупотреба на деца за партиски цели. Не дозволувајте децата да бидат предмет на манипулација. Покрај тоа, носењето деца на партски митинзи може да биде трауматично искуство за нив, особено поради вообичаениот фолклор: собирање во толпа, викотници, присуство на вооружени полицајци, голем број непознати луѓе одеднаш, говор на омраза, навреди, омаловажување, поттикнување нетрпелиовст, нагласува Меѓаши.
Амбасадата потсетува дека со Законот за заштита на децата во член 12 став (4) се забранува злоупотреба на децата поради политичко или верско организирање и дејствување. Во 1991 година Собранието на РМ ја донесе Декларацијата за заштита на детето од политичка манипулација и злоупотреба со која се забранува секаков вид политичка присила и организирање на децата како инструмент за политички притисок и злоупотреба и изложување на нивната физичка сигурност и здравје.